妹仔大過主人婆

又到價啱比你時間 ~ ~ ~

估吓呢札蔥值幾多$﹖

我知喺香港係唔駛用$買嘅，買菜時阿姐會「搭」條蔥。但喺我地呢度係要買嘅﹗超市都有得賣，但係就好貴，可以去到澳紙3蚊一札﹗所以我多數去「唐舖」買，平好多﹗大概0.6元至1元左右。

但係最近唔知咩原因，蔥價勁升，已到歷史性的高位﹗照計無外圍炒蔥架﹗上面果札要澳元2蚊（即港幣差不多15元）﹗

薑價暫時進入「熊市」，稍為夠膽用多少少薑；點知輪到蔥價進入牛市，唉﹗巧婦難為無「蔥」煮﹗

早輪因為自家菜園有出產，而市價未升，再加上我家勁愛食蔥，所以將存貨「豪用」。

唉﹗而家真係悔不當初﹗

目前蔥價未穩定前，唯有盡量以其他香料或配料代替，真係妹仔大過主人婆呀﹗